v\:* {behavior:url(#default#VML);}
o\:* {behavior:url(#default#VML);}
w\:* {behavior:url(#default#VML);}
.shape {behavior:url(#default#VML);}
Normal
0
false
false
false
MicrosoftInternetExplorer4
/* Style Definitions */
table.MsoNormalTable
{mso-style-name:”Table Normal”;
mso-tstyle-rowband-size:0;
mso-tstyle-colband-size:0;
mso-style-noshow:yes;
mso-style-parent:”";
mso-padding-alt:0cm 5.4pt 0cm 5.4pt;
mso-para-margin:0cm;
mso-para-margin-bottom:.0001pt;
mso-pagination:widow-orphan;
font-size:10.0pt;
font-family:”Times New Roman”;
mso-ansi-language:#0400;
mso-fareast-language:#0400;
mso-bidi-language:#0400;}
الفاضي .. يعمل قاضي
مسرحية
تأليف وأشعار : درويش الأسيوطي
الشخصيات
السلطة :
1. المنادي : في الخمسين من العمر في ملابس تراثية .
2. الوالي : في الستين ـ ضخم الجثة ـ تركي .
3. الوزير : في الأربعين ـ يبدو عليه الذكاء والخبث .
4. صاحب الشرطة : رياضي الجسم ـ حاد الملامح ـ في الثلاثين .
5. السطان : في السبعين ـ يبدو ضعيف السمع ـ لكنه ذكي .
فرقة أبو عجور :
1. أبو شبت : الحاجب1 ـ صاحب الأوزة
2. هنادي الدكر : الحمَّار ـ المعصوب .
3. ضلفة : الزوج
4. معيط : الشهبندر ـ كاتب 1
5. شعيط : الشاهد ـ حاجب 2
6. نطاط الحيط : مرمر ـ فرقع لوز ـ الكاتب2
7. أبو قردان : الدائن ـ الفلاح
8. عويضة الملز : الأراجوز ـ الفران
9. سنية شخلع : الراقصة ـ الزوجة
10. أبو عجور : القاضي
· جنود ورجال
· ملحوظة :
تجاهل المؤلف عمدا في توجيهاته الإشارة إلى عناصر من عناصر العرض المسرحي مثل الديكور والإضاءة حيث يراها غير ضرورية لهذه النوعية من العروض . وللمخرج أن يستنبطها من الحوار والحركة إن شاء .
ـــــــــــــــــــــــــــــــــــــــــــــــــــــــــ
للإتصال بالمؤلف :
هاتف :0108649030
بريد إلكتروني :al_asuty46@yahoo.com
المحتويات
(1) الافتتاحية
(2) مدخل
(3) فصل القاضي أبو عجور [ أخبار الحمقى والمغفلين لابن الجوزي]
(4) فصل مجلس العدل [ عن مسرحية توفيق الحكيم مجلس العدل ]
(5) آخرتها
(6) الخاتمة
الافتتاحية :
[ استعراض افتتاحي لفرقة أبو عجور لا علاقة له بالفصول ويمكن استبداله ] :
[ يبدأ العرض من خارج مساحة الأداء ، فيمكن أن تبدأ زفة أبو عجور من خارج المسرح ، أو من خارج السامر حتى تنتهي الزفة إلى قرب المساحة المخصصة للتشخيص ، أبو عجور بين أفراد الجوق ، أمامهم ترقص سنية شخلع ، وخـلفهم الفرقة الموسيقية ، أفراد من فرقة أبو عجور يقدمون بعض نمر السيرك إن أمكن ، والجميع يشاركون في الغناء والزغاريد ]
المجموعة : حلو يا رمان بلدنا
ماسخ يا رمان بعيد
كل ما أجيبك ع المخدة
تتدحرج .. وتروح بعيد
سنية : حلو يا رمان يا طايب
ياللي متشال للحبايب
بره عن شنبك ياشايب
دا الشجر طارح جديد
المجموعة : حلو يا رمان بلدنا ..
سنية : يارمان بطل شقاوة
كل يوم بتزيد حلاوة
والشباب بقى في الطراوة
وانت متهني و سعيد
المجموعة : حلو يارمان بلدنا ..
سنية : هز يا شجر المحبه
هز ف قلوب الأحبه
هب شوق القلب هبه
م البحيرة للصعيد ..
المجموعة : حلو يا رمان بلدنا
ماسخ يا رمان بعيد
كل ما أجيبك ع المخدة
تتدحرج وتروح بعيد
أصوات : واتدحرج واجري
يا رمان
وتعالى على حجري
يا رمان
حجري حنين
يا رمان
بس انت تميل
يا رمان
والحلو شاله
يا رمان
من تحت شاله
يا رمان
هفه الهوى
طاب واستوى
فتق زراير القمصان ..!!
[ تتوقف الزفه ويتوقف الرقص ]
أبو عجور : الليلة جينا نسليكم
ونفرفشكم .. وننسيكم
والمستخبي يبان ليكم
يصبح واضح ..
أبو قردان : الليلة جينا .. نسليكم ..
ونفرجكم .. ونهنيكم
بكلام جميل ..
وساعات جارح ..
بالبلدي كدا احنا جايين عشان تتفرجوا علينا .. !!
أبوعجور : [ ذاهبا إليه في هدوء مبتسما وهو يخيط قطعة ملابس بيده ]
لا يا أبو قردان .. احنا جايين نفرج الناس .. آه .. !! لكن نفرجهم
علينا .. لأ .. !! إحنا جوق محترم بنشخص فصول .. شكلها هايف
جدا للخمّال .. لكنها هادفة جدا ..!!
[ ملتفتا إلى جمهور الحضوروقد تجمع حوله أعضاءالفرقة ]
على فكرة يا اخوانا .. إللي قدامكم ده .. كله تشخيص في تشخيص
وتحبيظ وتبكيش !!
سنية : يعني زي ما انتوا عارفين .. !! يعني الوزير عامل وزير .. والقاضي
عامل قاضي .. حتى السلطان …عامل نفسه سلطان ..
هنادي : وهمه برضه .. عاملين نفسهم مصدقين وبيتفرجوا ..
سنية : ومش بعيده يكتشفوا ف آخر الليل إن ابو عجور مش أبو عجور ؟ !!
أبو عجور : احنا بنلعب لعبة ..
شعيط : احنا .. وانتوا ..
سنيه : لأ .. انتوا .. واحنا ..
أبو عجور : لعبة … بس لعبة جد ..
سنية : ان كنتوا مش عايزين .. بلاش ..!! نروح ..!!
معيط : آه .. نروح نشوف شغلنا ..
أبو قردان : ما هو كل واحد فينا له شغلته ..
ضلفه : إللي نجار ..
أبو شبت : وإللي صرماتي
شعيط : واللي فران ..
أبو شبت : أيوه .. واللي فران .. !!
سنية : [ تهز صدرها ]
واللي فنانة …
أبو عجور : صحيح لو ما اشتغلناش .. نص الجوق هينام من غير عشا .. ومتنكد .
لكن مش مهم .. المهم نرضيكم .. !!
سنيه : ان كنتوا موافقين تلعبوا معانا ..نسمع تسقيفه كبيرة .. تسقيفة
لابوعجور .. وفرقة أبو عجور ..
[ تصفيق من الجوق وربما بعض الحضور ]
أبو عجور : نبتدي اللعبة .. ؟
أصوات : نبتدي اللعبة ..
أبو عجور : خش على التشخيص وأعمال البدع والتهجيص
سنية : خش يا فنان .. !!
[ يبدأ الاستعراض ]
أبو عجور : فنان .. ؟!!
أيوه .. أنا فنان ..!!
أبو شبت : فنان طاقق ..بلسان فلتان ..
وحصان حرنان
ما يطقش قيوده ..
ولا يقبل في البق [ لجام] …
هنادي : ولا عمره وطَّى لعويل الضهر ..
ولا قدرت تلويه فرسان .. !!
سنيه : فنان فنان .. لكن شاعر ..
هنادي : شاعر واعر ..
سنية : مش قلبه .. لأ .. كله مشاعر .. ولسانه فصيح ..
أبو شبت : غصبن عن عين سيدنا [ أرسطو ]
فنان بصحيح ..
معيط : وكلامه الشوك ..
محبوك !!
أبو قردان : صعلوك ..
لكن تتهز لدقة قلبه عروش .. وملوك ..
ويبات ع الخيش على طول ..
أبو شبت : عمرانه الطاسه معاه ..مسطول
من غير تحشيش ..!!
وكلامه منبت من قلبه ..
وجدوره بتوصل للنغاشيش ..
سنية : فنان بصحيح .. !!وكلامه يفوت .. عسليه .. ومش ملتوت ..
مره ملفوت .. وكتير تصريح
هنادي : بيقولوا لسانه قبيح ..
ده صحيح ..
لسانه قبيح ..
لكن مش اقبح من وش الدنيا
السهتانه .. البهتان ..
معيط : عاقل جدا جدا .. زي المجانين ..
شعيط : ومع العاقلين ..
يقلبها جنان ف جنان ..
هنادي : فنان حكَّاي ..
مش باكي على سطرين
ف مجله أو جرنان ..
سنية : لكن بكَّاي ..!!
يبكي لو شكت قلبه لسعة ناي ..
أو شاف دمعايه تسيل …
على خد عجوز .. أو واد غلبان ..
علشان انسان ..
أبو عجور : فنان .. وتشوفني تقول مغرور ..
وأنا العدمان ..
مع إني بأعيش بقليب مكسور
بأتشقلب حسب الدور
وأكركر وأضحك ـ من قلبي ـ
وأنا الممرور ..
وأعمل فرحان مسرور ..
فرحان .. مسرور [ يضحك ]
أبو قردان : الدنيا دي مسرح زي ما قالوا زمان
والشاعر واخد فيها أصعب دور ..
لانه من دون الناس حساس ..
أبو عجور : وأنا شاعر .. لكن عفريت دساس ..
وبألسن حتى على نفسي ..
مش بس الناس
وبألسن على أتخنها تخين
ـ في السامر ـ كدا ع المكشوف .. أو بالمستور
على حسب الدور ..
وبأشك الطالع فيها كل خابور وخابور ..!!
ما أنا [ أبو عجور ]
أيوه [أبو عجور ].. طب هأنكر ليه ؟
لاأنا عمري بأخاف من بيه ولا تيه ..
وهأخاف ـ يا حسرة قلب أمي ـ على إيه ؟!!
أنا حيلتي إبه ..
لوضاع ـ غير العجورة ـ راح أبكي عليه .. !!؟
أبو قردان : لا زرعه ورايا ف غيط
ولا هانم متستته ف البيت ،
شعيط : ولا سقف سابوه لي ولاد الإيه ..
ولا ضلة حيط .. !!
أبو عجور : بالذمه لو انت مكاني ..
هتبكي .. والا تخاف على إيه ؟
الجميع : على إيه ..!!؟
[ مع التصفيق لفرقة أبو عجور من أعضاء الفرقة ، يدخل عويضة وخلفه نطاط يحملان أدوات مسرح الأراجوز ، عويضة يحمل كيس العرائس ويضع الأمانة تحت لسانه بينما يحمل نطاط الحيط [ الساتر]البرافان يتيادل أفراد فرقة أبو عجور النظرات في دهشة ويتراجعون جانبا ]
[ملحوظة :
هذا المشهد يمكن أن يرتجل به عن القضايا المحلية والآنية
عويضة : [ بصوت الأراجوز وعلى رأسه طرطور تدور في أعلاه كرة صغيرة راقصا قرب
أبو عجور معابثا ]
قرب قرب قرب
بص اللي واتفرج
قرب قبل ما يلعب
بص على الأراجوز
اتفرج على .. مرمر
مع جوزها واتنقور
واضحك لما تكـركر
ع الواد فرقع لوز
هتشوف قصه جنان
عن راجل عـدمان
متقريـف خرمـان
والبيت ياما يعوز
لا تقوللي ..السيمه
والا حسن .. ونعيمة
كله دا موضه قديمه
حتى .. أبو بزبوز
أبو عجور : [ منفعلا ] سامع ..؟ سامع يا ضلفه ..!! عويضة الملز .. بيلسن عليه أنا ..
بالشعر .. ؟
ضلفة : ما يقصدكش ياريس ..!!.
أبو عجور : مش بيقول أبو بزبوز..؟!!
هنادي : هو انت ببزبوز يا عجة .. ؟
أبو عجور : يوووه يا دكر .. !!
عويضة : قرب قرب .. قرب قبل ما يلعب ..
أبو شبت : ده هينصب ويلعب يا ريس ..
أبو عجور : ولا يهمك .. إن شالله يلعب قرد ..!! إذا لم تستح فافعل ماشئت .. !!
[ يتجمع جمع من الناس حول مسرح الأراجوز الذي صعد به عويضة ونطاط إلى مساحة التشخيص ويختفي عويضة ونطاط خلف الساتر ذو النافذة ليبدأ العرض ـ لابد من التنبيه على إعادة صياغة العروسة بما يتناسب والعرض عن بعد ـ يبدأ العرض بظهور الأراجوز في ملابس كثيرة ملونة ، يركب حمارا فارها ، وتظهر مرمر زوجة الأراجوز وفي صدرها مشغولات ذهبية وفي يديها أساورمما يدل على يسار الحال يبدو على الزوجة الحمل ]
مرمر : انت خارج يا جوزي يا أراجوزي؟
الأراجوز : خارج يامرمورتي يا قمورتي ..
مرمر : رايح على فين يا أراجوزي؟
الأراجوز : رايح غيط العنب ..
مرمر : وبعدين ؟
الأراجوز : البلح البلح البلح
[ تغنى أغنية اليلح وترقص سنية على الإيقاع للحظات حتى ينتهرها أبو شبت ويجذبها من يدهابعيدا عوض عويضة ]
مرمر : وبعده
الأراجوز : وبعده غيط القمح ..
مرمر : وبعدين
الأراجوز : وأفوت بالمره على مزرعة الفراخ
مرمر : طب حاسب من انفلونزا الطيور ..
الأراجوز : هو انا فرخة يا وليه ..
مرمر : لأ .. ديك .. كرررررر
الأراجوز : طب خشي لأديك على مناخيرك كرررررر
مرمر : ما تتأخرش ..
الأراجوز : ليه ؟
مرمر : حاسه بالوجع ..
الأرجوز : هتولدي يا مرمورتي يا قمورتي ؟
مرمر : آه
الأراجوز : أجيب لك الدايه ..؟
مرمر : لأ ه
الأراجوز : أجيب لك أمك ؟
مرمر : لأه
الأراجوز : أصحيلك أبوكي من الجبانة ؟
مرمر : لا .. خليه مونس أمك ..
الأراجوز : أمال عايزه إيه ؟
مرمر : هات لي مدرس خصوصي للواد .. !!
[ يختفيان ويظهر الطفل فرقع يحمل شنطة على ظهره ]
فرقع لوز : أمال فين حمارك ياأبا الأراجوز ؟
ألاراجوز : بعته يا فرقع يا ابني ..
فرقع : ليه ياآبا ؟
الأراجوز : عشان دروس الإعدادية ..
[ يختفيان وتظهر مرمر بلا أساور ]
الأراجوز : فين أساورك يا وليه ؟
مرمر : أساوري وأنا حره فيهم
الأراجوز : انطقي لأطلقك ..
مرمر : بعتهم ..
الأراجوز : عشان إيه .. ؟
مرمر : عشان دروس الثانوية العامة
[ يختفيان ثم يظهران وقد تجردا من كل شئ إلا ما يستر البدن ]
الأراجوز : اعمليلي شاي يا مرمر
مرمر : ما فيش سكر
الأراجوز : طب هاتي لي لقمة
مرمر : شيكارة الدقيق بقت بميه وخمسين جنيه يا أراجوز
الأراجوز : طيب يا مرمر .. شوية ميه أبل ريقي
مرمر : يا ريت .. مجلس المدينة رفع العداد عشان ما دفعناش المية
الأراجوز : مش مهم .. المهم إن الواد فرقع لوز .. يخلص جامعه .. يا رب ينجح
مرمر : يا رب ..
فرقع : مبروك يابا .. مبروك يا امه .. نجحت ..
[ ترتفع الزغاريد وتدق الطبلة ]
الثلاثة : وحياة قلبي وأفراحه
وهناه ف مساه وصباحه
ما لقيت فرحان في الدنيا
زي الفرحان بنجاحه
الناجح يرفع إيده
ويغني ف عيدنا وعيده
ويقول ونقول .. دايما
ناجحين على طول دايما
ناجحين على طول .. دايما ..
الأراجوز : [ في الحد الأدني من الملابس ]
وبعدين يا فرقع .. ؟
فرقع : ف إيه يا ابا .. ؟
الأراجوز : هتقعد كدا في البيت ؟
فرقع : ما انت مش مديني مصاريف عشان أخرج
الأراجوز : أوكلك وأشربك .. وأديك مصاريف كمان .. !!
مرمر : وتجوزه كمان ..!!
الأراجوز : هو أنا ناقص أكالين عيش .. اطلع شغلك
فرقع : صاحب الشغل رفدني
مرمر : ولدك اترفد يا أراجوز وانت ساكت ؟!!
الأراجوز : وعايزه إيه ؟
مرمر : روح اشتكي للقاضي
الأراجوز : القاضي معينه الوالي .. و هيعمل له خاطر
مرمر : وإيه دخل الوالي بالموضوع ؟!!
الأراجوز : جوز بنت الوالي .. هوه صاحب الشغل
مرمر : روح للوزير ..
الأراجوز : جوزه أخته
مرمر : روح لصاحب الشرطه
الأراجوز : بقى أخو مراته يا مرمر
مرمر : الله هو الوالي اتجوز البلد ؟!!
الأراجوز : علي يد القاضي يا مرمر ..
مرمر : والعمل يا جوزي؟
الأراجوز : يا إما الوالي يطلقنا .. يا إما أطلقك يا مرمر
مرمر : يادهوتي .. هيطلقني !!
الثلاثة : يسعد صباحك
يا شبعـــان
وتعيش ف أمان
ما تباتشي
ولا ليله جعان
ولا يوم تحتار
وإيه إللي
هيحير بالك ؟!!
ماهي داعيالك
والشركه تدفع
لعيــــالك
يورو .. ودولارات
ياآبو العيال
الله يعينك .. على مصارينك
الطماعين مش عاتقينك
وسطا وتجار
الشكوى لله
نفضنا
مهما قبضنا
غول الغلا
بيقرقضنا ..
ويسيبنا ف نار
الحاله وصلت
للآخر ..
والجوع كافر
من بكره يا رب
ياساتر
قولوا يا ستار
[ تصفيق من الحضور عدا أبو عجور وأبو شبت يجمع عويضة ونطاط عدة الشغل
في زهو ويجلسان بين المتفرجين ]
المدخل :
[ يدخل المنادي وقد ربط على وسطه طبلة صغيرة يدق عليها في فترات ما بين الجمل يطوف بين الحضور [ المتفرجين ] . بينما يحتشـد في جانب من السامر [ دائرة التشخيص أو خشبة المسرح ] الوالي وحراسه وحاشيته من العمال والوزير وصاحب الشرطة . ]
المنادي : يا أولاد الحلال .. اسمعوا وافهموا .. واللي يفهم .. له مني نص ريال .. !! أمر السطان قرموط حفظه الله ورعاه .. وهو يدخل السنة الخامسة من حكمه السعيد .. منذ أجلسه الله علينا .. وولاه .. !!
هنادي : [ من السامرتزغرد ] خمسه وخميسه ف عين إللي ما يصلي على النبي .. !!
المنادي : قرر وله القرار والأمر .. أن يضيف إلى اسمه لقبا جديدا .. يسأل الله أن يكون سعيدا ..
أبو شبت : [ من السامر ] [ نيولوك ] يعني ..؟!!
شعيط : لزوم الفترة الجديدة ..
المنادي : لقد صار اسمه من اليوم .. السلطان العادل ..
ايو شبت : اشمعني ..؟!!
المنادي : لانه ناوي يحقق العدل بين العباد .. وينفي الظلم من أرض البلاد ..!!
صوت : [ من الحاشية ] عاش السلطان العادل قرموط ..
الحاشية : عاش السلطان العادل قرموط ..
الوالي : السلطان العادل بس يا حوش ..
صوت : [ من الحاشية ] عاش السلطان العادل بس..
الحاشية : عاش السلطان العادل بس..
هنادي : [ من السامر ] اللهم اجعله خير .. هيه .. كمل يا وش السعد والهنا ..
المنادي : قرر السلطان العادل أن يمتحن القضا .. وأن يكون عنه في رضا ..!!
معيط : هو القاضي داخل .. نحو الاميه .. ؟!!
هنادي : اخرس يا معيط .. ما توديناش ف داهية .. قاضي المدينة حنبلي .. وروحه ف مناخيره .. !!
المنادي : وسيحضر السلطان مجالس العدل .. فمن رآه عادلا من القضاه .. أبقاه .. ومن رآه غير صالح عاقبه وأقصاه .. وخوزق من ولاه ..!!
الوالي : أبه .. يا حفيظ !!
الوزير : فيه إيه ؟
الوالي : أكيد يقصدني أنا الوالي ؟
أبو قردان : [ من السامر ] الله .. طبعا .. مش انت إللي بتعين القاضي .. ؟!!
الوالي : اخرس ولد مشخصاتي بكاش .. قول منادي قول ..
المنادي : ومن نال رضاه .. قربه وأدناه .. وكافأه السلطان وأرضاه .. وأرضى من ولاه
الوالي : هاه هاه .. هذا عدل .. !!
صوت : [ من الحاشية ] يحيا العدل ..
الحاشية : يحيا العدل ..
سنية : [ من السامر ] همه الجماعة دول بيهتفوا على إيه يا ريس ؟
أبو عجور : على ما تفرج يا سنية .. !! [ ضحك صاخب من مجموعة أبو عجور ]
المنادي : [ خارجا ] وعلى آهالي المدينة .. التجمع هنا أمام القصر .. يوم الجمعة بعد صلاة العصر .. لحضور مجلس العدل .. والحاضر يعلن الغايب .. وأجرك على الله يا ولد لحلال .. يا أولاد الحلال .. اسمعوا وافهموا وإللي يفهم .. له عندي نص ريال ..
[ أصوات مختلطة بين الكتلتين ]
أبوعجور : أحمدك يا رب .. فرجت يا اولاد !!
أبو شبت : إزاي ؟
أبوعجور : هنشتغل يا ابو شبت ..
سنيه : فين ؟
أبو عجور : هنا يا بريمادونا .. قدام القصر ..!! همه هيلموا الناس .. واحنا نشتغل ..!!
سنيه : ومن غير عويضه الملز ونطاط يا ريس ؟!!
أبو عجور : المرسح يا سنية يا بنتي .. أكبر من كل الفنانين .. كان قبلنا .. وهيفضل بعدنا
ضلفه : معلوم يا ريس .. بس انت برضك قلبك كبير ..!!
شعيط : تقدر ترضيهم بكلمتين من كلامك الفارغ .. !!
أبو عجور : حسن الملافظ سعد يا شعيط .. لازم الكبير يفضل كبير يا ضلفة .. والصغير لازم يحترم الكبير .. دي تقاليد جوق أبو عجور من يوم ما اتوجد .. ولحد آخر يوم ف عمري ..!! أنا لسه ما عجزتش .. أنا أقدر بعون الله اقدم فصل لوحدي هوه عشان الناس سقفت له يقوم الملز يعمل فيها نجم .. أبدا .. !!
الوالي : [ داخلا من باب القصر المطل على السامر ]
مصيبات كبيرات .. مصيبات كبيرات .. سلطان يمتحن القضا .. ؟ أمان
ربي اتفضحنا ورحنا بلاش ..
الوزير : أول مره يا مولاي أسمع بحاجه زي دي .. السلطان يمتحن القضا !!
الوالي : اسمع وزير .. هات لي شيخ قاضي ملعون .. لازم اتفق معاه ..!!
بعدين يسوحنا أفندم ..!! سلطان قرموط حفظه الله ..
ص الشرطة : السلطان العادل يا مولاي
الوالي : نعم .. السلطان العادل قرموط
ص الشرطة : السلطان العادل بس ..
الوالي : السلطان العادل بس .. قرموط .. ما تعرفش تمسكه من فين أفندم . !!
يا وزير اصرف حوش دول .. وهات لي شيخ عفاريت فورا ..!!
ص الشرطة : فورا يا مولاي .. [ نازلا إلى السامر ]
ياللا يا واد منك له .. لم جرابيعك يا ابوعجور .. وشوف لك مكان غير
هنا
أبو عجور : [ ممثلا بشكل أداء صوتي مبالغ فيه ]
أي ..!! قتلت يا أبوي .. !! جرابيع ؟ أكبر رجالات الفن في السلطنة جرابيع ؟ لالا .. من فضلك اسحبها يا صاحب الشرطة .. !!
شعيط : اسحبها وإلا ..
الوالي : انت بتهددنا افندم .. ؟
هنادي : ما يهددكمش ليه يا حبيبي ..!! السلطان قرموط جاي ونشتكي له يا
عنيه !؟
الوالي : آخ .. مسكوا صباع مدوحس بتاع حضرتنا أفندم .. لو شيخ عفاريت
قاضي هنا .. كنت خليته علمكم الأدب أفندم .. !!
سنيه : ان كان عندك قاضي شيخ عفاريت .. إحنا عندنا قاضي جلدة .. إيده ما
تخرش الميه !! وبيني وبينك يا مولاي ما شربش شاي من أول الليلة
ومخلص سجاير .. وزعلان من عويضة ونطاط .. وشايط .. والنبي ما
تكح قدامه دلوقت .. ليطسك ست اشهر !!
الوالي : أمان ربي ..!!
ص الشرطة : سيبهم لي يا مولاي الوالي الحوش دول .. أنا أعرف اتعامل معاهم ..
الوزير : مش كل حاجه كسر قصب يا صاحب الشرطة ..!! لازم السلطان يعرف
أننا نقيم دائما حوارا ديمقراطيا جادا .. بينا وبين المواطنين .. رعايا
مولانا السلطان ..
أبو شبت : أيوه .. صح احنا من رعايا مولانا السلطان ..
أبو عجور : يا مولاي .. إحنا بنشتغل على باب الله .. بنسترزق .. بنعمل ..زي ما
قال الميثاق الله يرحمه .. العمل شرف ..العمل واجب .. العمل حق..
العمل حياة ..
سنية : أحسن م البطالة وقعدة الارصقة ..
هنادي : تعدم نظرك ما تكسفني يا ذوق .. !! اقعد اتفرج ببلاش .. وكلام رجالة
لوما عجبكش شغلنا .. نمشي .. !!
الوزير : [ جانبا ] يا مولاي .. احنا مش ناقصين شوشرة .. دول عالم فاقده ..
يلسنوا علينا قدام السلطان ..!! وما تنساش أننا مش قادرين نعتر في المخفي القاضي ..!! وبعدين لما دول هيشتغلوا .. هيلموا أمة لا إله إلا الله قدام القصر .. والناس تبقى كتير .. وهيصة .. وبالروح بالدم نفديك يا قرموط وده طبعا هيفرح قلب مولانا السلطان ويحس قد إيه رعاياه بيحبوه .. وقد إيه جناب الوالي شايف شغله !!
الوالي : هاه هاه .. جناب الوالي فهم ..
أبو عجور : أخيرا .. ؟!! الحمد لله ..
الوالي : خليهم يشتغلوا أفندم ..
ص الشرطة : بس في هدوء ..!!أي مشكلة .. هاضرب في المليان ..
الوزير : اتسلى يا مولاي بيهم .. على ما أعمل محاوله أخيرة أنا وصاحب
الشرطة يمكن نعتر في القاضي الضايع .. !!
الوالي : يا رب .. تعتروا في شيخ عفاريت ..!!
اشتغل فرجنا ولد .. عجورة ..
أبو عجور : توكلنا على إللي بيأكلنا .. يا ابو شبت ..
أبو شبت : [ في جانب من الصالة يدخن الجوزة ]
جاي يا ريس ..
أبو عجور : انت بتعمل إيه .. ؟
أبو شبت : بأضرب نفسين .. يعدلوا الطاسه ..
أبو عجور : منك لله .. وده وقته ..؟!! لم الدور يا أبو شبت .. هنشتغل ..!!
[ ملتفتا إلى عويضه ونطاط بين المتفرجين معبرا بيده ]
لازم نشتغل ونكيد العوازل قلالات الأصل ..!!
هنقدم فصل القاضي .. خش ف دور الحاجب يا واد يا ابو شبت ..
أبو شبت : جاهز يا ريس ..
هنادي : خش ع التشخيص .. وأعمال البدع والتهجيص .. بكرة تفرج يا غلبان
ونهيص ..!!
[ يذهب الوالي وحارسه ليجلسا في الشرفة ويتفرق أعضاء الفرقة في السامر وتصعد سنية شخلع على دائرة التشخيص وتتلفت حولهابين المتفرجين ]
سنية : بست .. بست .. انت يا عويضة .. يا نطاط ..
عويضه : بتندهيلي يا سنية ؟
سنيه : أمال بأنده لأمي يا ملز .. !! هات نطاط واطلع لي ..
[ يصعد عويضه ونطاط متلفتين ]
عويضة : سنية .. بعدين الريس أبو عجور يشوفنا ..
سنية : ما تجمد أمال يا ملز .. ما يشوفنا .. إحنا بنسبل لبعض .. والا بنعمل لا
سمح الله ..
نطاط : الريس إيده طرشه .. وأنا زي ما انتي شايفة ..
عويضة : وكمان مليان مننا ع الآخر ..
سنيه : له حق .. إزاي تبقوا ولاد الجوق .. وتخرجواعن طوعه ..
عويضة : من غلبنا يا سنية ..
نطاط : إن كبر ابنك خاويه ..
سنية : يخاوي مين يا حاج .. دا انت بتلعب في الوقت الضايع ..ما قلناش
حاجه .. بس حصل إيه عشان تسيب معلمك يا ملز .. وتسرح في
الحارات بأراجوز ؟!!
نطاط : الله .. وماله الأراجوز ؟
عويضة : ما كله تشخيص ..
نطاط : قال إيه إللي رماك ع المر ..
عويضة : إنت عارفه أنا قد إيه بأحب الريس .. وحاطه كدا .. حاجه كبيرة .. لا
الكسار .. ولا ولاد عكاشة .. !!
سنيه : عارفه يا أخويه .. وعارفه قد إيه هوه كمان بيحبك .. ومعتبرك ولده
البكري .. وشايف فيك شبابه ..!!
نطاط : هوه أبو عجور كان شباب ..
سنيه : آه .. بس مش على أيامك .. !! فهموني بس .. مربط الفرس فين ؟
عويضة : الريس بيدي الأدوار الكبيرة لعيال لسه جايه امبارح ..
نطاط : أشبال .. ما لهمش خبرة ..
سنية : بس لعيبة يا أبو الكباتن ..
عويضة : بقى أنا.. عويضة الملز .. أقعد على الدكة .. وأبو شبت يلعب البطولة
سنية : الله .. ما حازم إمام قعدوه ع الدكة .. ولعب بداله شيكابالا ..
عويضه : بس أنا مش حازم إمام
نطاط : ولا أنا شيكابالا ..
سنيه : اسمع يا عويضه .. بيني وبينك .. أبو عجور محتاجك في الشغل التقيل
إللي جاي .. ودي فرصتك عشان ترجع الجوق ..
عويضة : آه .. قولي كدا .. وأنا بأقول إيه الحنيه إللي نزلت على البريمادونا ..
عشان محتاجني أبو عجور .. ابتدا يدور عليه ..
نطاط : لا وإيه .. بعت لنا المزة بتاعة الفرقة .. عشان ننخ ..!!
عويضة : لا .. خلليأبو شبت ينفعه ..
سنية : يا ملز افهم .. أنا ما حدش بعتني .. أنا باقيه ع العيش والطعميه إللي
قطعوا قلبنا سوا .. مش مخلصني بعد العشرة الطويلة دي .. انت تبقى
ف ناحية .. والجوق ف ناحية .. وكل واحد يلسن ع التاني .. !!
عويضه : قصدك ..
نطاط : يعني الريس ما ..
سنيه : أيوه .. أبو عجور ما يعرفش إني جايالكم .. أنا انتهزتها فرصه .. همه
راحوا يلبسوا للفصل .. وأنا جيتكم .. قلتوا إيه ؟
عويضة : أنا في منتهى الخجل يا سنية .. حقك عليه .. ما تزعليش
سنيه : واخده على طولة لسانك يا ملز ..
عويضة : الصراحة الفصل ده طالع من عيني ..
نطاط : آه .. وأنا أموت وأرجع الجوق .. بس عزة نفسي ما نعاني ..
سنية : معلهش يا ست .. انتوا عارفين إن الريس قلبه أبيض ..
نطاط : فله ..
عويضه : بس زعله وحش قوي ..
سنيه : من عشمه ياأخويا ..
عويضة : يعني إنتي شايفه إيه ؟
سنيه : بعد الفصل بتاع القاضي أبو عجور .. تخش عليه .. منكسر ووشك في
الأرض .. ومعلهش .. حقك علينايا ريس .. وكلمة منك وكلمه مني ..
وشحتيفه من هنا ودمعه من هنا .ز يرضى ويروق .. ويبقى زي مية
الوضوء .. إيه رأيكم ؟
نطاط : بس ما فيناش م الضرب يا سنية ..
سنية : هوه انت حمل ضرب يا راجل .. يللا .. زوغوا أحسن طالعين ..
[ يهرب نطاط وعويضة بين المتفرجين وتتوجه سنية بحديثها إلى
المتفرجين ]
تسقيفه جامدة لابو عجور .. وجوق أبو عجور .. والآن .. مع فصل
القاضي أبو عجور ..
فصل: القاضي أبو عجور :
[ الفصل مأخوذ عن أخبار الحمقى والمغفلين ـ لإبن الجوزي ]
[ أبو عجور وبعض أعضاء فرقته في ملابس تراثية قريبة من طرز العصر المملوكي وقد اتخذوا أماكنهم على مكان التشخيص أبو عجور في دور القاضي وأبو شبت في دور الحاجب وشعيط في دور الكاتب ]
أبو عجور : [ في ملابس القاضي متقعرا في الأداء الصوتي مقلدا بعض الشيوخ
على المنابر ]
لأن الله يأمر بالعدل .. فباسم العدل .. ولأنه الله لا يستحي من الحق ..
فباسم الحق .. ولأن الحق هو الله .. فباسم الله الرحمن الرحيم نفتتح
المجلس .
[ تصفيق حاد من الجوق يقف أبو عجور وينحني محييا ]
معيط : الله يا معلمة ..
شعيط : أهو كدا يا مريسة ..
هنادي : أعد يا عجة .. [ زغاريد ]
أبو عجور : [ يعود إلى مجلسه ]
نادي يا حاجب على الخصوم .. الدائن والمدين ..
أبو شبت : [ في دور الحاجب ]
المدين هنادي الدكر .. قصدي هنادي الحمَّار .. والدائن كبير الشطار ..
قصدي كبير التجار .. الشهبندر ..
هنادي : [ الحمار ] يا نعم .. أنا الحمَّار ..
أبو شبت : خشي يا وليه على مجلس القاضي .. !!
هنادي : ولولت عليك أمك يا أبو شبت ..!! حيرتوني .. إن عملت راجل ..
تقولوا يا وليه ..!! وان عملت ست .. تقولوا لي يا دكر ..!! منكم لله
جوق قليل الذوق .. !!
أبو شبت : فلتة لسان يا هنادي .. وربنا المعبود ما أقصد .. عديها .. الريس أبو
عجور يسمعك يحبسني .. ده قاضي غتت .. خش للقاضي
الحمار : أخش للقاضي ليه ؟ أنا سنجه والا إيه ؟
[ يدخلان أمام القاضي ] هو أنا عملت حاجه يا قاضي يا حلو يا مسمسم انت ؟
أبو عجور : ما انتي بتتكلمي زي الستات أهه ؟ أمال مسمينك الدكر ليه ؟
هنادي : عشان الحسد يا عجه ..!!
أبو عجور : هوه فيه متهم يا هنادي يقول للقاضي .. يا حلو يا مسمسم .. ؟
هنادي : الله هو أنا كلمتي تقيله عليكم ليه .. ما ابو شبت عمال يطجن ما حدش
قال له تلت التلاته كام .. والاعشان ماانا ست ..؟
أبو عجور : ست ؟!! بس بس .. ما تقلبيهاش مناحه وتقومي علينا مجلس النسوان
خشي في الدور ..
هنادي : حاضر .. [ بصوت رجالي ] انتوا جايبيني هنا ليه .. ؟ عملت إيه ؟
معيط : مش عارفه عملتي إيه يا هنادي ؟
أبو عجور : انت كمان انطسيت في نظرك يا معيط ..؟ مش شايف قدامك إيه ؟
بذمتك إللي زي الأستك .. السخصية إللي قدامك .. راجل والا ست ؟!!
معيط : بصراحة .. لولا عارف إنها هنادي الدكر .. كنت حسبتها راجل !!
هنادي : جرى إيه يا ريس ؟ إحنا هنشخص وإلا هنقضيها تريقة ؟ مش كفاية
أبو شبت ؟
أبو عجور : إللي قدامك .. لابس راجل والا ست ؟
معيط : راجل لابس راجل ..
أبو عجور : خلاص .. دي سخصية الحمَّار .. يعني صاحب الحمار .. وانت الحمار
قصدي كبير التجار .. سوق ..
الحمار : أقدر أعرف أنا مربوط هنا ليه ؟
الحاجب : يا عينك يا جبايرك يا أخي .. مش عارف ليه ؟
الحمار : أعدمك وأعدم الحمار في يوم واحد .. ما أعرف ..
القاضي : المدعي إللي يتكلم .. !!
[ تسود فترة صمت ]
أبو شبت : انطق يا معيط .. اتكلم ..
معيط : القاضي بيقول المدعي يتكلم .. قال الشهبندر يتكلم ..؟!! اسكت يا عم
ما تجيبلناش الكلام ..
أبو شبت : ما انت الشهبندر والمدعي يا (بو) .. !!
معيط : يا سلام ؟!! أول مره ألعب دورين في نفس واحد ؟ آدي آخرة الفرجة
على مهرجان المسرح التجريبي يا ريس .. !!
أبو عجور : [ متمالكا نفسه ] يا معيط ..!! يا معيط اتعالج من غباوتك دي ..!!
المدعي .. يعني ..
هنادي : يعني إللي ما حيلتوش غير الدعا .. روح يطسك جحش أعور .. كدا ..
مش كده يا ريس ؟
أبو عجور : لا يا فالحه .. المدعي هوه إللي بيطالب بحقه إللي رافع الدعوى ..
اسمه المدعي ..
هنادي : ما شاء الله .. قطر والله .. سوق ..
القاضي : إيه شكوتك يا ابني ؟
الشهبندر : الحمَّار الضلالي ده يا مولاي ..
القاضي : عيب .. حسن ملافظك .. إيه ضلالي دي ..؟!!عيب .. ده لا من
شيمنا ولا من قيمنا على رأي الله يرحمه .. آه .. ما حدش يشتم حد
في المحكمة احنا محكمة محترمة .. مش استاد اسكندرية ..!! محكمة
ولا محكمة العدل الدولية . ما حدش يشتم حد قدام القاضي .. مفهوم
وإلا ورحمة أمي .. أحبسك ..!! فين الأخلاق ..؟!!
[ يظهر الوالي وحرسه من النافذة العريضة التي تطل على مكان
التشخيص سعيدا بينما يدخل الوزير وصاحب الشرطة في صمت ]
هاه .. ماله الحمَّار الضلالي ابن الكلب ده ؟
[ يلاحظ دهشة الجميع فيلتفت للكاتب ]
شيل البقين الزفرين دول من محضر المجلس .. ماله الحمار ده ؟
الشهبندر : سلفته 12 دينار يا مولاي .. ومش عايز يردهم .. !!
القاضي : صحيح انت استلفت من الراجل ده 12 دينار يا حمار إنت ؟
الحمار : الكدب خيبه يا مولاي .. حصل ..
القاضي : [ ملتفتا إلى الكاتب ] اكتب يا ابني .. أقر المدين بالدين .. عظيم ..
ومش عايز ترد الدين للدائن ليه ؟ ناوي تصهين عليه ؟
معيط : تصهين يعني إيه ؟
أبو عجور
